Sa pihak sang pahayag ni United States President Donald Trump nga may yara na sang negosasyon, nag-atake ang Iran sa Israel kag sa pila ka Gulf Arab states.
Bangud sa amo nga atake, may damage kag injuries nga narekord sa Tel Aviv. Liwat man nga nagwangwang ang mga air raid sirens sa Israel lakip na sa kapital sini.
Nakitaan man nga may mga buho na sa multistorey apartment building, apang indi pa klaro kun direkta ini nga igu ukon debris lang sang missile bangud sa pag-intercept sang Israel Air Defense.
Sa inisyal nga impormasyon halin sa emergency medical service, may anum ka mga tawo nga nasamaran halin sa apat ka nagkalain-lain nga areas.
May mga na-trap man sa isa ka building sa Tel Aviv, kag may mga sibilyan man nga nakit-an sa shelter sa isa ka na-damage nga building.
Sa update naman sang Israeli military, naglunsar man sila sang atake sa Central Tehran.
Ila ginpuntariya ang nagapanguna nga command centers lakip na ang mga pasilidad nga naangot sa Islamic Revolutionary Guard Corps’ intelligence arm kag Iranian Intelligence Ministry. Masobra sa 50 ka dugang nga targets ang ginpang-igo sang gab-i lakip na ang ballistic missile storage kag launch sites.
Una na nga ginpahayag ni Trump nga naga-negosyar na ang US kag Iran, apang gintawag ini sang Tehran nga fake news kag gina-anunsyo lang sang US President agud ma-manipula ang oil kag financial market.#
