ILOILO – Wala sang hinalung-ong ang probinsya sang Iloilo nga subong na nga semana sugudan ang pagtukod sang flyover sa Ungka II, Pavia, Iloilo.
Sa interview sang Bombo Radyo kay Board Member Ramon Sollano, chair sang Committee on Transportation sa Sangguniang Panlalawigan, iya ginpahayag nga kaangay nga gin-‘bypass’ sang Department of Public Works and Highways (DPWH) ang Iloilo Provincial Government bangud wala sang ginhimo nga koordinasyon sa mga opisyal sang pamunuan.
Suno kay Sollano, nagapati siya nga daku kuntani ang mabulig sang proyekto agud mabuhinan ang pagpugok sang trapiko sa lugar, apang bangud sa kakulang sa pagpahibalo sa iban nga mga ahensya partikular na sa probinsya, nagtuga ini sang problema.
Halimbawa, suno sa natungdan, tuman ka apektado ang mga nagabisita sa probinsya kag sa syudad, ilabi na ang naga-agi sa Iloilo International Airport, bangud wala naplastar sang maayo ang rerouting scheme.
Malaw-ay man nga impresyon ang matuga sang decongestion suno kay Sollano ilabi na bangud ginalauman nga madamo nga tawo ang magapadulong sa syudad kadungan sa selebrasyon sang Dinagyang Festival 2020.
Dugang pa sang natungdan, nauna na nga ginhingyo sang Sangguniang Panlalawigan sa DPWH nga pahibaluon sila sa tion na may i-implementar nga national project, kag nagpromisa man ang pamunuan nga magapahibalo sila sa mga opisyal, apang natabo ini liwat subong nga bulan.
Kaangot diri, ginhingyo sang Sangguniang Panlalawigan sa nasambit nga ahensya nga ipakita liwat ang proper rerouting scheme, kag ginhingyo man sa contractor sang amo nga proyekto nga magbutang sang nagakaigo nga early warning devices agud malikawan ang aksidente.
Nahibaluan nga sang nagligad nga tuig pa ang nakabutang nga pagsugod sang proyekto apang subong lang ini naumpisahan.
Magadugay ang implementasyon sang proyekto sa sulod sang 18 ka bulan.
