Solusyonan sa labing madali nga panahon sang Department of Public Works and Highways (DPWH) ang nagatuga sang traffic hazards sa Senator Benigno Aquino Jr. Avenue, Mandurriao, Iloilo City.
Ini kasunod sang pagkabunggo-patay sang Mazda MX5 nga sportscar sa mag-asawa nga Joe Marie kag Alnie Dinah Osano samtang nagatabok sa pedestrian lane.
Sa interview sang Bombo Radyo Iloilo kay Engr. Rodney Gustilo sang Iloilo City District Engineering Office, iya ginpahayag nga ila pagatun-an upod sa Public Safety and Transportation Management Office (PSTMO) ang pag-identify sang porsyon sang dalan nga nagakadapat nga safe nga pahamtangan sang pedestrian lane.
Suno kay Gustilo, sila man ang magabutang sang rumble strips 20 metros antes ang pedestrian lane. Ginpahayag man ni Gustilo nga dapat pabutangan man sang railings ang mga island agud indi magpinagusto tabok ang mga pedestrian.
Ginalantaw man sang city engineer ang posibilidad sang pagpatukod sang dugang nga pedestrian overpass sa lugar.
Ginaplano naman ni Gustilo nga magpatigayon sang public counsultation agud mapamatian ang opinyon sang mga pumuluyo natuhoy sa nasambit nga mga plano.
