Nasapwan nga wala na sang kabuhi ang isa ka lalaki sa sulod sang comfort room sang isa ka gasoline station sa Barangay Q. Abeto Mirasol, Mandurriao, Iloilo City.
Wala pa sang kumpirmasyon sang identity sini apang sandig sa inisyal nga impormasyon, nagaedad ini sang 35 ukon 40-anyos pasaka kag isa ini ka driver sang jeep apang indi residente sang amo nga barangay.
Sa interview sang Bombo Radyo kay Punong Barangay Ramon Amoroso, iya ginpahayag nga may nakakita nga ‘las singko pa sa hapon nagsulod sa CR ang amo nga lalaki, apang 10:00 sang gab-i (Mayo 11) na sang namutikan nga wala ini nakaguwa bangud may mabulos man kuntani nga driver apang nakasirado ang CR.
Sang ginpili nga buksan na, nakit-an nga nakapungko ang lalaki sa toilet bowl, nakaluslos na ang pantalon, nagaduko ang ulo, kag daw kaangay nga nagabarikutot ang kamot nga daw nasakitan.
Posible suno sa punong barangay nga na-stroke ini ukon may ginbatyag man sa tiyan bangud gina-alegar nga palainom ini.
Ginahulat pa ang pormal nga kumpirmasyon sa identity sini, apang suno kay Amoroso, may mga driver nga nagapahayag nga wala ini sang pamilya diri sa Iloilo.#
