Doble nga disgrasya gid ang naabtan sang isa ka lalaki matapos nga naaksidente sa motorsiklo sa Dumangas, Iloilo kag sang ulihi nakuhaan pa gid sang 40 gramos sang ginapasuni shabu.
Ini amo si alias Niloy, 32, residente sang Barangay Lacturan sa amo man nga banwa.
Sa interview sang Bombo Radyo kay Police Staff Sergeant Josebel Doromal, imbestigador sang Dumangas Municipal Police Station, iya ginpahayag nga halin sa Lacturan padulong sa Sapao ang direksyon ni alias Niloy sang nakabunggo ini sa isa pa ka motorsiklo bangud nagsaylo ini sang lane.
Base sa mga nakakita, madasig ang pagpadalagan sini sang motorsiklo antes ang insidente kag ginapatihan nga posible nakainom sang makahulubog nga ilimnon.
Gindala ini sa ospital sa Barotac Nuevo kag sang ginbukad ang iya bag agud kuntani mausisa kun may yara sang Identification Card, nakit-an sang pulis ang plastic sachets sang suspected shabu.
Magluwas diri, may yara sang isa ka sachet sang amo man nga iligal nga droga sa iya bulsa kag ginapatihan may standard drug price nga P272,000.
Gin-refer ini sa ospital sa Pototan bangud ginpahayag nga na-utod ang tul-an sini sa paa.
Base sa record sang pulis, na-preso man sadto si alias Niloy bangud man sa kaangtanan sa iligal nga droga.
