JARO, ILOILO CITY – Dako nga katingalahan para sa mga barangay officials sang Barangay Desamparados, Jaro, Iloilo City ang pagkaaresto sa 11 tanan ka mga durugista sa lugar.
Ini matapos nga nadakpan sa akto ang mga ini nga naga-‘pot session’ sa sulod sang isa ka boarding house.
Ang mga arestado amo sanday Roberto Latoza, 26, subject sang operasyon kag ginakabig nga high value individual, nagatrabaho bilang construction worker kag residente sang Barangay San Isidro, Jaro, Iloilo City; Leopoldo Ubaldo, 34, tricycle driver sang Barangay Airport, Mandurriao, Iloilo City; Angelo Galia, 18 sang Barangay San Isidro, Jaro, Iloilo City, Marken Dela Peña, 20, sang Barangay Desamparados, Jaro, Iloilo City; Elmer Lucot, 39, sang Barangay Lopez Jaena, Jaro, Iloilo City; Asher Sanchez, 19, sang Barangay Alalasan, Lapuz, Iloilo City; Felipe Yanco, 36, sang Barangay 6 Victorias City, Negros Occidental; Armando Diaz, 29 sang Barangay Alalasan, Lapuz, Iloilo City; alyas Nonoy, 16, sang Barangay San Isidro, Jaro, Iloilo City; Carlos Bitonga, 38, sang Grandplains, San Isidro Village, Jaro, Iloilo City; kag Roel Raymundo, 37, sang Rizal, Lapuz, Iloilo City.
Sa interview sang Bombo Radyo kay Punong Barangay Nestor Lobaton, iya ginpahayag nga apisar sang ila pagpinunguha nga mapapas ang iligal nga droga, may yara sa gihapon nga makalusot.
Suno kay Lobaton, ang mga arestado ang naghalin pa sa nagkalain-lain nga lugar sa diin nagtililipon ang mga ini agud lang nga makagamit sang droga.
Bangud sini, ginpakamaayo sang barangay nga gub-on nalang ang boarding house agud indi na maliwat pa ang kaangay nga insidente.
Nahibaluan nga narekober sang mga otoridad ang P7,000 nga drug buy-bust money, 11 tanan ka mga sachet sa suspected shabu nga nagabug-at sang 60 grams nga may standard drug price nga nagdangat sa P408,000.
