Nakabiya na sa Pilipinas sanday Manila Archbishop Jose Cardinal Advincula kag si Kalookan Bishop Pablo Virgilio Cardinal David agud makatambong sa lubong ni Pope Francis.
Subong nga gab-i sang ginpaguwa sang Archdiocese of Manila-Office of Communications ang mga laragway ni Cardinal Advincula samtang pasulod ini sa Ninoy Aquino International Airport (NAIA).
Mas nauna naman sa byahe si Cardinal David nga amo man ang presidente sang Catholic Bishops’ Conference of the Philippines (CBCP).
Magluwas nga maga-attend sila sa funeral sang Pope sa Sabado, magapreparar man sanday Advincula kag David sa conclave ukon ang papal election.
Sanday Advincula, David, kag si Luis Antonio Cardinal Tagle nga amo subong ang Prefect of the Dicastery for Evangelization kag didto na sa Vatican ang lunsay eligible nga magpasakop sa pag-eleher sang Santo Papa.
Indi naman pwede nga maka-upod sa eleksyon sanday Manila Archbishop Emeritus Gaudencio Cardinal Rosales kag Cotabato Archbishop Emeritus Orlando Cardinal Quevedo bangud masobra na sa 80-anyos ang ila nga edad. Mahimo lamang sila makaupod sa preparatory General Congregations sang College of Cardinals.
Nahibaluan nga matunog ang pangalan ni Cardinal Tagle nga isa sa posible magapungko nga masunod nga Santo Papa, apang nagpanawagan ang CBCP sa mga Pilipino nga respetuhon ang Cardinal electors kag likawan ang ikampanya ang Filipino cardinal.
Lunes sang napatay si Pope Francis bangud sa stroke kag irreversible heart failure.#
