ILOILO – Ginkumpirma ni Police Major Raymond Celoso, hepe sang Sta. Barbara Municipal Police Station, nga nagsungka na ang duha ka iban pa nga mga suspek sa pagluthang-patay sa miyembro sang Bureau of Jail Management and Penology (BJMP) Region VI sa Bangga Dama, Brgy. Bolong Oeste, Sta. Barbara, Iloilo.
Ang duha nga ginatumod nga suspek amo sanday Staff Sergeant Nelson Sorilla Jr., 40, residente sang Barangay Binangkilan, Santa Barbara, Iloilo kag Nilo Silao alias Tata, 47, residente sang Magsaysay St., Calinog, Iloilo kag miyembro sang Citizen Armed Force Geographical Unit (CAFGU).
Una na nga nadakpan sang mga pulis malapit sa public market ang isa ka suspek nga si Private First Class Bjourn Kirby Esposo, 26, assigned sa 12th Infantry Battalion sang Philippine Army sa Calinog, Iloilo kag residente sang Barangay Malitbog Ilaya, Bingawan, Iloilo.
Una naman nga ginpahayag ni Esposo nga siya ang nagluthang sa biktima nga si Jail Senior Inspector Andrew Larupay, 51, jail warden nga assigned sa La Carlota City Jail sa Negros Occidental kag residente sang Barangay Caninguan, Lambunao, Iloilo kasunod sang road rage.
Nagapanindugan si Esposo nga wala na sang kahilabtanan ang duha niya ka kaupod sa nagluntad nga pagpangluthang.
KINDLY READ RELATED STORY HERE: https://www.facebook.com/dyfmBOMBOILOILO/photos/a.1054628021242720/4083310875041071/
