Gin-athag ni Interior Secretary Jonvic Remulla nga wala sang ebidensya ang mga awtoridad nga naga-angot sa pamilya Duterte sa 512 ka kilo nga shabu nga nakumpiskar sa Laos nga plano kuntani i-smuggle sa Pilipinas.
Suno sa tiglikom, bisan madugay na nga political allies ang pamilya Duterte kag si Edrieza Rimbang nga ginatudlo nga isa ka drug financier, wala sang pamatuod nga ang ila kaangtanan may involvement sa illegal drug shipment.
Dugang sini, may mga ebidensya nga kilalahay ang pamilya Duterte kag si Rimbang, apang wala sang ebidensya nga naga-link sa pamilya sa shabu shipment.
Apang ginkwestyon ni Remulla kun ngaa wala nalakip si Rimbang, nga iya ginalaragway bilang kilala nga personalidad sa illegal drug trade, sa narco watchlist sang panahon sang anti-drug campaign ni anay Presidente Rodrigo Duterte.
Ginalaragway ni Remulla si Rimbang bilang isa ka financier kag lider sang iya kaugalingon nga organisasyon.
Ginkumparar man ni Remulla ang kaso ni Rimbang sa kaso ni anay Iloilo City Mayor kag subong Interior Undersecretary Jed Patrick Mabilog, nga nalakip sa drug watchlist bisan pa nga, suno kay Remulla, wala ini sang kahilabtanan sa iligal nga droga.
Suno sa Interior Secretary, ginapakita sang kaso ni Mabilog ang mga epekto sang anti-drug campaign nga wala nakasunod sa due process ukon nagakaigo nga proseso sang pagpatuman sang kasuguan.
Naghalin anay sa pungsod si Mabilog matapos niya nga ginpahayag nga yara sa katalagman ang iya kabuhi kasunod sang paglakip sa iya ngalan sa drug watchlist.
Samtang, ginapadayon sang mga awtoridad ang imbestigasyon sa iban pa nga mga indibidwal nga mahimo may kahilabtanan sa shabu shipment sa Laos, kag ginalantaw man ang posibilidad nga indi si Rimbang ang head sang bilog nga drug network.
