ILOILO CITY – Nagpasar sang resolution sang House committee on constitutional amendments nga naga-ilis sa economic provisions sang 1987 Constitution agud buksan ang Pilipinas para sa foreign management kag control.
Sa exclusive interview sang Bombo Radyo kay Iloilo 3rd District Rep. Lorenz Defensor, vice chairman sang House committee on constitutional amendments, iya ginpahayag nga kabug-usan nga 64 ka mga myembro sang House committee on constitutional amendments ang nagboto pabor sa Resolution of Both Houses (RBH) No. 2 nga ginsulat mismo ni House Speaker Lord Allan Velasco.
Tatlo lang ka mga mamalidha ang nagboto batok sa RBH 2, kag tatlo naman ang nag-abstain.
Lakip sa mga nagpamatok amo sanday Bayan Muna Representatives Carlos Zarate, Ferdinand Gaite, kag ACT Teachers Rep. France Castro.
Samtang ang mga nag-abstain naman amo sanday House Minority Leader Joseph Stephen Paduano, Quezon City Rep. Jose Christopher Belmonte kag Cavite Rep. Jesus Crispin Remulla
Lakip sa mga nagboto pabor sa RBH 2 amo ang mga deputy speakers, nga ex-officio members sang panel.
Kaundan sang RBH 2 amo ang pagdugang sang phrase nga “unless otherwise provided by law” sa constitutional provisions nga nagamando nga ang mga Filipino citizens lang ang maka control, makapanag-iya, maka-arkila sang duta sang public domain, natural resources, public utilities, educational institutions, mass media companies kag advertising companies sa Pilipinas.
Nagakahulugan nga ang mga mamalidha ang mahimo makagamit sang layi agud mabatak ang current prohibitions sang foreign investors — sa diin wala ini ginapasugtan sa Constitution nga himuon sa subong.
Apang matapos ang mosyon ni Defensor, naghisugot ang mga mamalidha nga kakason ang proposal nga nagahatag sang pahanugot sa mga foreigners nga makapanag-iya sang duta sa Pilipinas.
Tungod sini, wala na ginlakip sang panel ang amendment sang Article 12, Section 7 sang Constitution, sa diin nasaad nga “no private lands shall be transferred or conveyed except to individuals, corporations, or associations qualified to acquire or hold lands of the public domain.”
Sa idalom sang RBH 2, ang Kamara kag Senado ang magaboto sang separado agud aprubahan ang economic amendments.
Ginpahayag ni Ako Bicol Party-list Rep. Alfredo Garbin Jr., nga ang debate sa plenaryo ang maga-umpisa sa tunga-tunga subong nga bulan sang Pebrero.
Ginpanugyan man sang mamalidha nga ang plebisito nga magaboto ukon mamalabag sa proposed amendments, ang patigayunon na lang kadungan sang 2022 national elections agud mas makakinot.
Samtang, ginpahayag naman ni Velasco nga kinahanglan ang pag-attract sang foreign capital agud suportahan ang ekonomiya sang Pilipinas nga nagtibusok bangud sa COVID-19.
Apang ginpahayag naman ni Zarate nga ang Charter change (Cha-cha) ang makapalala lang sa ekonomiya sang pungsod.
