Nakuha ni Ernest John “EJ” Obiena ang silver medal sa iya labing-una nga pagbalik sa international pole vault competition halin sang nagpahuway sang 2024 bangud sa back injury.
Nagpasakop ang Pinoy Olympian sa International Springer-Meeting Cottbus sa Germany kun sa diin na-clear sini ang 5.65-meters.
Mahapos sini nga na-clear ang 5.40, 5.55, kag 5.65 bars antes nagpaiway sa 5.70 meters kag nagtinguha pa kuntani sa 5.75 meters apang napaslawan sang tatlo ka beses.
Nagpangaduha si EJ sa American kag Paris Olympics silver medalist nga si Sam Kendricks nga isahanon nga nakalukso sang 5.75 meters.
Madumduman nga Agusto sang gin-anunsyo sang Pinoy athlete nga temprano sini nga tapuson ang 2024 season bangud sa injury nga nagakinahanglan gid sang pahuway.
Bangud sadto, wala ini nakaupod sa iban pa nga mga kumpetisyon kag wala man nadayon ang Philippine International Pole Vault Challenge nga iya kuntani ginplano para sa Septyembre.
Ang amo man nga injury ang ginbatas sini samtang nagapreparar sa Paris Olympics, kun sa diin nagkabos ini nga makakuha sang medalya matapos nagpang-apat sang gin-rank na ang players via countback.
Nag-us-os man ang Asian record holder sa rank number 4 halin sa pangaduha nga pwesto sa world rankings nga iya gina-uyatan antes ang Olympiada.
