Nagbalik na naman sa pagpang-atake ang Russia sa kritikal nga mga energy infrastructure sa Ukraine.
Sandig sa Ukraine Air Force, nagpalupad ang Russia sang 71 missiles kag 450 ka mga drone kahapon. Sa sini nga numero, 38 ka mga missile kag 412 ka mga drone ang napunggan nga makasulod, samtang 27 naman ka missiles kag 31 ka drones ang nakaigo kag nakatupa gid sa 27 ka mga lugar.
Ini ang pinakadaku nga pagpang-atake nga ginhimo sang Moscow sa Ukraine subong nga tuig. Ini man ang pinakadamo nga munitions nga ila ginpaulan sa isa lang ka gab-i kun basehan ang record halin sang Disyembre 27.
Sa post naman sang Russian Defense Ministry, ginkumpirma nila ang daku nga strike sa military-industrial complex kag energy facilities sang Ukraine. Ini nga mga pasilidad suno sa Russia amo ang ginataguan sang mga long-range unmanned aerial vehicles.
Sa kumpirmasyon naman ni Ukrainian President Volodymyr Zelenskyy, naigo ang mga rehiyon sang Sumy, Kharkiv, Kyiv, Dnipro, Odesa kag Vinnytsia kag nahalitan gid ang mga energy infrastructure kag pati ang residential buildings.
Siyam ang kumpirmado nga pilason sa amo nga insidente.#
