MAASIN, ILOILO – Hugot ang ginapatuman nga Enhanced Community Quarantine sa tatlo ka mga banwa sa probinsya sang Iloilo nga wala na sang Persons Under Monitoring kag Investigation.
Santo sa record, isa ang banwa sang Maasin sa tatlo ka banwa kaupod ang Pototan kag Carles nga wala pa sang may na record nga kaso sang Coronavirus Disease 2019 (COVID-19) kag wala na sang numero sang PUI kag PUM.
Sa interview sang Bombo Radyo kay Mayor Francis Amboy sang Maasin, Iloilo, iya ginpahayag nga hugot ang ginapatuman nga lockdown sa bug-os nga banwa kun sa diin ginalimitahan ang market hours.
Suno kay Amboy, may yara sang schedule nga ginasunod agud nga indi magdinaguso ang tawo sa merkado kag masunod nga physical distancing.
Ginpahayag ni Amboy nga ang mga may yara lang sang quarantine pass ang ginapahanugutan nga makasulod sa banwa sang Maasin.
