ILOILO CITY – Wala nakamitlang si Presidente Rodrigo Duterte tuhoy sa estado sang power distributor sa syudad sang Iloilo kadungan sang iya pagtambong sa ika-25 nga National Federation of Motorcycle Clubs in the Philippines nga ginhiwat sa Iloilo Convention Center (ICC).
Sa interview sang Bombo Radyo kay Marcelo Chacho, Administrative Manager sang Panay Electric Company (PECO), iya ginpahayag nga nagtambong siya kaupod ang iya amay nga si PECO President Luis Miguel Cacho sa kahiwatan matapos nga gin-imbitar sang mga motorcycle enthusiast.
Sa ginpatigayon nga kahiwatan suno kay Cacho, nahatagan man sila sang kahigayunan nga maka-istorya sang makadali si Presidente Duterte apang wala nahinambit ang tuhoy sa estado sang PECO kag sang MORE Electric and PowerCorporation.
Ginpahayag ni Cacho nga may yara gid sang nagakaigo nga tion kag lugar agud nga maka-istorya nila ang presidente tuhoy sa estado sang PECO kag MORE.
Bisan pa nga isa sa mga legal adviser sang PECO ang umagad ni Duterte nga si Atty. Manases Carpio, wala nagapahilabot ang presidente tuhoy sa pagdesisyon sa Temporary Restraining Order (TRO) nga ginpasaka sang PECO batok sa MORE.
Sa baylo nga magpahilabot suno kay Cacho, ginatugyan na lang sang presidente sa korte ang pagdesisyon tuhoy sa legal battle sang duha ka electric company.
