ILOILO CITY- Hingyuon ni Iloilo City Councilor Ely Estante kay Mayor Jerry Treñas ang pag-reactivate sang Task Force Infrastructure sang Iloilo City Government.
Ini kasunod sang mga reklamo sa delayed nga completion sang mga infrastructure projects sa syudad.
Sa interview sang Bombo Radyo kay Councilor Estante, Chairman sang Committee on Infrastructure sang Iloilo City Council, iya ginpahayag nga katuyuan sini nga ma-monitor ang tanan nga mga infrastructure projects kag ma-pressure ang mga kontraktor sang mga proyekto nga tapuson ang mga ini sa natalana nga date of completion.
Magluwas diri, ginpahayag ni Estante nga dapat istriktuhan gid sang Department of Public Works and High Ways ang ila mga kontraktor.
Ginarekomendar man niya nga hatagan sang Department of Public Works and High Ways ang City Engineer’s Office sang otoridad agud mag-supervise sang mga proyekto.
Dugang pa ni Estante, sa masami, ginarason sang mga kontraktor ang pagbubo sang ulan kun ngaa nagaka-delay ang pagtapos sang mga proyekto.
Apang suno sa opisyal, siya mismo ang makapamat-ud nga may mga bes nga wala sang tawo nga nagaubra sa gina-construct nga mga proyekto kag kulang man ang mga equipment rason nga nagakadelay ang mga infrastructure projects.
Magluwas diri, posible man, suno sa iya, nga dululungan ang mga gina-award nga kontrata sa mga kontraktor gani nagadululungan man ang mga proyekto nga indi nila maarapalan.
Mas maayo man suno kay Estante nga patigayunon nalang ini nga mga proyekto sa tion sang tig-ilinit kag indi kun tig-ululan.
Isa sa gintumod ni Estante amo ang ginakaayo nga dalan sa San Antonio, Molo nga sang Hunyo pa kuntani ang completion date apang wala pa natapos tubtob subong nga nagatuga naman sang huol sa mga motorista.
