Pasidunggan sang 7th Entertainment Editors’ Choice (EDDYS) Awards ang beterana nga aktres nga si Eva Darren kag iban pa nga movie icons sang Pilipinas sa palaabuton nga Hulyo 7 sa Pasay City.
Kilalahon sila bangud sa ila kontribusyon kag dedikasyon agud nga matib-ong ang local film industry.
Sa amo man nga event, hatagan man sang pagkilala ang anay comic strip creator nga si Carlo J. Caparas kasunod sang iya nahimo para sa Philippine movie industry. Siya ang napatay sang nagligad lamang nga bulan.
Matandaan nga nangin matunog ang pangalan ni Darren sang nagligad nga semana matapos ginbuyagyag sang iya anak nga gin-imbitar siya sa 72nd Filipino Academy of Movie Arts and Sciences (FAMAS) Awards bilang presenter apang wala man ginpasaka sa stage.
Ginpreparahan sang aktres ang event kag gindala pa ang iya mga apo, apang sang tion nga siya na ang ma-present sang award, lain ang ginpaupod sa iya kuntani partner nga si Tirso Cruz III bangud gin-alegar nga wala siya nakita sang organizer sa venue.
Ginsuguran ni Darren ang iya karera sang 1960s, nakadaog sang duha ka awards sa “Ang Pulubi” (1969) kag nominasyon sa iya papel sa “Ligaya Ang Itawag Mo Sa Akin” (1997). Nalantaw man ini sa mga palaguwaon nga “Pangako Sa ‘Yo” (2000) kag “Sineserye Presents: Patayin Sa Sindak si Barbara” (2008) kag sa mga pelikula nga “Ang Lalaki sa Buhay ni Selya” (1997) kag “Ate” (2018).
