ILOILO CITY – Gina abi-abi ni anay Department of Health (DOH) Sec. Janette Garin ang pagpasaka sang sampaw-sampaw nga kaso batok kanday Public Attorney’s Office (PAO) Chief Atty. Persida Acosta kag Dr. Erwin Erfe sang forensics laboratory sang PAO.
Ini ang kasunod sang pagpasaka sang kaso nga malversation of public funds, falsification of public medical documents, grave misconduct kag abuse of authority batok kanday Acosta kag Erfe may kaangtanan sa Dengvaxia controversy.
Sa exclusive interview sang Bombo Radyo kay Sec. Garin, iya ginpahayag nga ang nasambit nga mga kaso ang ginpasaka sang grupo sang mga abogado gikan sa University of the Philippines (UP).
Sa pagpaathag ni Sec. Garin, wala sang pahanugot gikan sa Kongreso ang PAO nga magpatigayon sang forensic examination sa mga bangkay sang kabataan nga ginapahayag biktima sang Dengvaxia vaccine.
Ini bangud nga ang may katungdanan nga magpatigayon sang forensic examination amo ang Philippine National Police (PNP) kag National Bureau of Investigation (NBI) crime laboratory.
Magluwas nga wala sang kinamatarong sa pagpatigayon sang forensic examination, ginpahayag man sang anay tiglikom nga si Dr. Erfe ang indi makabig nga pathologist bangud sa kakulang sang medical credentials.
Ginlakip man sang natungdan sa mga kapaltahan nanday Acosta kag Erfe amo ang pagpatalang sang publiko paagi sa paghimu-himu sang mga pamatuod agud nga pakalainon ang vaccination program sang DOH.
