ILOILO CITY – Ginakalipay ni anay Department of Health (DOH) Sec. Janette Garin ang pagkabasura sang tatlo sa walo ka mga kaso nga ginpasaka batok sa iya kag sa iban pa nga mga opisyal may kaangtanan sa Dengvaxia controversy.
Sa exclusive interview sang Bombo Radyo kay Sec. Garin, iya ginpahayag nga ang tatlo ka kaso ang ginbasura sang korte bangud sa rason nga ‘lack of jurisdiction’.
Sa tatlo ka korte nga nagbasura sang kaso, duha diri ang nagakatingala suno kay Sec. Garin kun nga-a ginlapta sa nagkalain-lain nga korte sa pungsod ang pagpasaka sang kaso.
Maathag suno sa anay tiglikom nga ‘harassment’ kag pagpang-ipit ang ginhimu sang Public Attorney’s Office (PAO) batok sa iya kag sa iban pa nga mga medical expert bangud nga ginlapta sa nagkalain-lain nga korte sa pungsod ang pagpasaka sang kaso batok sa ila sa baylo nga sa isa ka korte lang dapat ipasaka ang kaso.
May kaangtanan diri, ginapaabot man sang natungdan nga may 36 pa ka dugang nga kaso nga ipasaka batok sa iya kag sa mga kaupod nga medical experts.
