ILOILO – Ginpreso na sa New Bilibid Prison sa Muntinlupa City si anay Janiuay, Iloilo Mayor Frankie Locsin.
Si Locsin ang ginpamatbatan sang 10 ka tuig nga pagkapreso bangud sa kaso nga paglapas Section 3(e) sang Republic Act 3019 ukon Anti-Graft and Corrupt Practices Act.
Sa exclusive interview sang Bombo Radyo kay Police Lieutenant Colonel Joem Malong, spokesperson sang Police Regional Office 6, iya ginpahayag nga matapos ang na-hospital arrest sa Manila, ginsaylo na si Locsin sa New Bilibid Prison.
Ang kaso ang nag-ugat bangud sa maanomaliya nga pagbakal P15 million nga bulong sang siya pa ang nagapungko bilang alkalde sang Janiuay, Iloilo.
Matandaan nga sang Enero 15, 2001, nagpatawag sang bidding ang local government sang Janiuay, Iloilo.
Lakip sa mga nagpasakop sa bidding amo ang PhilPharma Wealth, Europharma Corporation, kag Malix Drug Center.
Sang amo man nga adlaw, ang proyekto ang gin-award sa Malix kag Europharma Corporation.
Apang sa ulihi, natukiban nga isa lang ang tag-iya sang duha ka kumpaniya.
Gilayon naman nga ginterminate sang Commission on Audit (COA) ang proyekto kag ginpasakaan sang kaso sang Office of the Ombudsman ang mga naangot sa anomaliya kag mangin si Locsin.
Sa ginpapanaog nga desisyon sang Sandiganbayan, napamatud-an nga guilty si Locsin kag lima ka iban pa sa kaso nga Anti-Graft and Corrupt Practices Act or Republic.
Ini amo sanday Accountant Carlos Moreno Jr., Budget Officer Ramon Tirador, Treasurer Luzviminda Figueroa, Ricardo Minurtio, kag businessman nga si Rodrigo Villanueva.
Si Locsin ang gindakop samtang nagakuha sang clearance para sa iya pusil sa National Bureau of Investigation (NBI) Region 6 office sa Iloilo City sang Hunyo 3, 2019.
Apang gindala siya sa Western Visayas Medical Center sa Mandurriao, Iloilo City matapos gin-atake sang hypertension.
Sa ulihi, ginsaylo si Locsin sa The Medical City Iloilo sa Molo, Iloilo City.
Sang nag-ayo na ang iya kondisyon, gindala si Locsin sa pribado nga hospital sa Manila tubtub gindala sa New Bilibid Prison.
