ILOILO CITY – Nagpagwa sang pahayag si former President Rodrigo Duterte may kaangtanan sa pagtindog ni House Speaker kag Leyte 1st district Rep. Ferdinand Martin Romualdez para sa integridad sang House of Representatives.
Suno sa anay presidente, wala sang problema kun nagasugid sang matuod si Romualdez.
Pahayag niya, dapat man ini nga pasalamatan.
Ginpahayag man niya nga wala siya sang kaugot kay Senior Deputy Speaker Aurelio ”Dong” Gonzales Jr. sa pagtumod sa iya nga amo ang nagapakalain sa House of Representatives.
Si Gonzales ang nag-resign bilang katapo sang Partido Demokratiko Pilipino–Lakas ng Bayan (PDP-Laban) kag Treasurer man sang amo nga partido antes ginhingadlan si Duterte.
Pahayag ni Duterte nga amo ang chairman sang PDP-Laban, wala sang problema para sa iya kun magapabilin nga myembro si Gonzales sa ila partido.
Dugang pa niya, mahimo man nga pun-an sang partido sang bag-o nga mga kandidato samtang nagahilapit ang May 2025 elections.
Suno sa iya, ang importante amo ang prinsipyo.
