Hulaton anay ni Iloilo City Councilor Ely Estante Jr. ang pormal nga deklarasyon sang national government nga optional na ang pagsuksuk sang face mask antes amyendaran ang Face Mask Ordinance sa syudad sang Iloilo.
Sa interview sang Bombo Radyo sa konsehal nga amo ang proponent sang Face Mask Ordinance sa Iloilo City, iya ginpahayag nga indi mahimu nga dali-dalion ang pagkakas sini nga pagsulundan samtang nga wala pa sang pirma si President Bongbong Marcos.
Ginalikawan suno kay Estante nga magsalangisag ang publiko pananglitan, halimbawa, may lain naman nga mandu ang iban nga government agencies.
Ginpasalig sini nga kun mapirmahan na sang presidente ang rekomendasyon sang Inter-Agency Task Force for the Management of Emerging Infectious Diseases nga himuon nga indi mandatory ang pagsuksok sang face mask outdoors, may amendments man gilayon nga himuon sa ordinansa.
Matandaan nga una na nagpahayag si Iloilo City Mayor Jerry Trenas nga kumporme siya sa rekomendasyon sang task force apang indi anay ini mag-isyu sang executive order kag hulaton na lang nga si Presidente Marcos mismo ang magmando sini.
Gin-athag sini nga indi mangdakop ang otoridad sa syudad sa mga pumuluyo nga wala nagasuksok sang face mask. ##
