”Makawat ang akon nga kuring”
Ini ang dako nga homemade sign nga ginbutang sang isa ka nagapanag-iya sang hinuptanan nga kuring sa gwa sang iya balay.
Ang hinuptanan nga kuring amo si Esme kag ang nagapanag-iya naman sa iya amo si Kate Felmet sang Beaverton, Oregon sa Estados Unidos.
Nalakip sa mga nasambit nga tinaga sa sign ang drawing sang itsura ni Esme nga may bitbit nga glove nga amo ang ginkawat sini sa kaiping nga balay.
Sa kilid sang dako nga sign nakahalay ang pila ka mga gloves kag face mask nga ginkawat ni Esme halin sa mga kaiping nga balay sa diin, nasaad man sa sign ang abiso sa mga kasilingan nga kuhaon na lamang nila ang ila ginapanag-iyahan nga gamit.
Ang nasambit nga senyales nga ginhimo ni Felmet may kaangtanan sa iya ginhingadlan kawatan nga kuring, ang nangin bantog sa bug-os niya nga kasilingan.
Bangud sa amo nga senyales sa gwa sang balay ni Felmet, madamo sang naham-ot sa iya hinuptanan nga kuring.
Madamo man sang nagpadulong sa gwa sang balay ni Felmet agud kuhaan sang picture ang mga nakahalay nga gloves nga ginkawat ni Esme lakip na ang makahalam-ot nga homemade sign.
Ang hinuptanan nga kuring ang nangin kaangay man sang isa ka minor celebrity matapos nangin agaw-atensyon sa online world apisar nga kawatan.
Suno sa site nga ‘The Conscious Cat’, may yara sang ‘prey-retrieval’ instinct ang mga kuring sa diin ginadala sang mga ini sa ila ginakabig nga ‘safe place’ ang tanan nga inanimate object nga ila masapwan.
