Fan ni Jungkook nga nag-doorbell sa iya balay sang 133 beses, nagapangatubang sang deportation kag pagka-preso

Ginsentensyahan sang korte sa South Korea sang isa ka tuig nga pagkapreso ang isa ka Brazilian fan kasunod sang “extreme level of obsession” sa K-pop superstar nga si Jeon Jung-kook.

Ini matapos napamatud-an sa korte nga may salabton ang babaye sa paglapas sang anti-stalking law sang pungsod kag sa trespassing ukon iligal nga pagsulod sa pribado nga propiedad.

Una siya nga nagkadto sa puluy-an sang K-pop idol sa Seoul sang Disyembre sang nagligad nga tuig.

Pagkatapos sini, nagbalik-balik siya sa propiedad sang mga 21 ka beses tubtob Disyembre 28.

Nagpindot siya sang doorbell sang 133 ka beses kag nagsulod pa gid sa propiedad sang Disyembre 14 matapos nga mabilin nga bukas sang isa ka food delivery worker ang side gate.

Bisan pa nga nadakpan na siya, ginpaguwa man kag ginpaandaman nga indi na magkadto sa propiedad sang K-pop star, padayon gihapon siya sa pag-stalk sa masunod nga mga semana.

Sang ulihi, nagpagwa ang mga awtoridad sang isa ka emergency order nga nagadumili sa babayi nga magpalapit sulod sang 100 metros sa propiedad.

Apang bisan sini, padayon gihapon siya sa pagpakita didto kag nagbilin pa sang mga litrato kag mga nakaimprinta nga materyales malapit sa puluy-an.

Bangud sini, ginpasakaan siya sang kaso kag gin-refer sa mga piskal sang Pebrero.

Apang, ginsiling sang huwes sang district court nga may yara man sang pila ka mga kahimtangan nga nagapahagan-hagan sang iya sala. Suno sa korte, ang ginhimo sang babayi naghalin sa iya pagdayaw kay Jeon Jung-kook kag indi bangod nagatuyo siya nga halitan ini.

Gindugang man sang huwes nga indi na siya posible nga magliwat sang amo nga sala bangud ginapaabot nga mapa-deport siya matapos nga mangin pinal na ang desisyon.

Sa South Korea, ang mga mapamatud-an nga nakalapas sa 2021 anti-stalking law mahimo masentensyahan sang tubtob tatlo ka tuig nga pagkabilanggo ukon multahan sang tubtob 30 milyon ka won ukon katumbas sang P1.2 milyon.