Ginatutukan sang Iloilo Provincial Culture, Arts, History and Tourism Office ang agri-farms, culture and heritage, kag eco-tourism sites
sa probinsya indi lamang agud matib-ong ang turismo kundi agud makabulig man sa produksyon sang pagkaon.
Sa interview kay Mr. Gilbert Marin, head sang amo nga opisina, iya ginpahayag nga magluwas nga daku ang kontribusyon sang farms sa sektor sang agrikultura sa probinsya, may bulig man ini nga mga lugar sa tourist arrivals sa Iloilo.
Lakip man sa mga tikang sang provincial government suno sa natungdan amo nga i-preserba, tatapon, kag i-promote gid ang cultural heritage areas rason nga ginahingyo sa local government units nga magbalay sang ila kaugalingon nga ordinansa para nga proteksyunan ang ila nga cultural properties.
Nahibaluan nga sandig sa report sang tourism office, nagdangat sa masobra 318,500 ang tourism arrival sa probinsya sang 2023 nga may yara sang pagsaka nga halos 10 percent halin sang 2022.
Nagapanguan diri ang fifth district kaangay man sa naglinigad nga mga tinuig kun sa diin 39-40 porsyento gid sang tourist traffic sa bilog nga probinsya. Ginalantaw nga rason diri amo ang island destinations kag mainland attractions nga rason kun ngaa madamo ang naga-overnight sa amo nga distrito nga ginabug-usan sang Ajuy, Balasan, Barotac Viejo, Batad, Carles, Concepcion, Estancia, Lemery, San Dionisio, San Rafael kag Sara.
Nagapangaduha sa pinakadamo nga turista amo ang 1st district kun sa diin madamo ang heritage destinations; pangatlo ang 4th district kun sa diin ginalantaw nga factor ang 18th National Scout Jamboree sa syudad sang Passi sang Disyembre; ginasundan sang 3rd district kun sa diin ginabalik-balikan ang eco-agri destinations; kag ulihi ang 2nd district kun sa diin ginapabugal ang eco-culture.
Sa tourist arrivals sang 2023, 98% gid ang domestic tourists kag halos dos porsyento lamang ang foreigners.
