Naangkon sang Gilas Pilipinas ang una nga kapaslawan sa FIBA Asia Cup Qualifiers inadlaw matapos ang duha ka asud-asud nga kalutusan nga naagyan sa friendly games.
Ginlutos sang Chinese Taipei ang Gilas, 91-84, sa ila home court sa Taipei Heping Basketball Gymnasium sa Taiwan sa imbukada nga hampang sa third and final window sang qualifiers, Pebrero 20.
Maragtason ini nga kadalag-an para sa Taiwan bangud ini ang una nga tion halin sang 2013 Asian Cup nga napierde nila ang Pilipinas.
Na-usik ang 39 points, 8 assists, kag 6 rebounds nga nahimo ni Justin Brownlee sa kamot sang kasumpong nga ginapangunahan sang ila naturalized big man nga si Brandon Gilbeck kag Mohammad Gadiaga.
Balos man ini para sa Taiwanese matapos ginkamasaan sila sang Gilas paagi sa 53-puntos nga abanse sa first window sang ila una nga pag-atubangay isa ka tuig na ang nagligad.
Sa bahin sang Filipinos, nagsunod kay Brownlee sa puntos sanday Dwight Ramos nga may 15 points kag AJ Edu nga may 10 points.
Bangud napanas na ang undefeated record sang Gilas, patas na ini subong sa New Zealand nga may 4-1 win-loss record sa Group B. Magakit-anay ang New Zealand kag Pilipinas para sa rematch 10:00 sa aga sa Domingi, oras sa Pilipinas.
The Scores
Chinese Taipei 91 — Lin 21, Gadiaga 21, Lu 18, Ma 14, Gilbeck 8, Chen 5, Tseng 2, Liu 0, Chou 0, Lan 0.
Philippines 84 — Brownlee 39, Ramos 15, Edu 10, Fajardo 9, Newsome 7, Thompson 4, Perez 0, Oftana 0, Tamayo 0.
Quarters: 22-20, 47-45, 71-61, 91-84.
