Mas nagahilapit ang Philippine women’s national football team sa handum sini nga makabalik sa FIFA World Cup stage matapos nga naka-abante na sa 2026 AFC Asian Cup quarterfinals.
Nakuha sang Filipinas ang spot sa quarterfinals matapos ginlutos sang Japan ang Vietnam, 4-0.
Bangud sa amo nga resulta, nalakip ang team sang Pilipinas sa two best third placers sa tournament.
Matandaan nga duha ka sunod-sunod nga kalutusan ang naangkon sang Filipinas sa kamot sang powerhouse teams nga Australia kag South Korea antes ini nakadaog batok sa Iran, 2-0.
1-0-2 ang win-draw-loss record sang Filipinas sa Group C nga indi pa bastante agud nga makasulod sila sa quarterfinals, gani nga nagdepende ang ila kapalaran sa mangin resulta sang hampang sang iban nga teams.
Ang senaryo nga ginlantaw amo nga dapat lutuson sang Japan ang Vietnam sang may at least tatlo ka goals matapos nga ginlutos sang Uzbekistan ang Bangladesh sang Lunes, 4-0.
Wala naman ginpaslaw sang world No. 8 Japanese side ang paglaum sang Pilipinas matapos ang 4–0 victory batok sa mga Vietnamese subong nga Martes.
Talakladon ang banas sang Pilipinas bangud ang Japan mismo ang atubangon sini sa quarterfinals sa Marso 15.
Pananglitan magdaog ang Philippine team, magasulod sila sa semifinals kag makakuha naman sang spot sa FIFA World Cup sa 2027. Kun malutos naman, magadiretso ang team sa play-in matches.#
