Nagkit-anay para sa weekend meal sanday Angelica Yulo kag Rovelyn Baterbonia nga mga iloy sang duha ka Pilipino nga atleta nga nangin sentro sang atensyon bangud sa ila tagsa-tagsa nga istorya sa pamilya.
Si Angelica amo ang iloy sang two-time Olympic champion kag two-time Asian Games gold medalist nga si Carlos Yulo, samtang si Rovelyn amo naman ang iloy sang nagtaliwan nga Ateneo basketball player nga si Rene Baterbonia.
Gin-post ni Angelica ang ila litrato nga may caption nga: “FINALLY!!!” Nag-post man si Rovelyn nga may caption naman nga “Basher Attack.”
Madasig nga nakakuha sang atensyon sang netizens ang amo nga post, ilabi na bangud una na namensyonar ni Rovelyn sa isa ka interview nga diutayan lang sila magkitaay ni Angelica sang Septyembre apang wala nadayon bangud sang ila nga schedule.
“Nagkakilala kami kasi may isa akong kaibigan na kaibigan din niya. Noong pumunta kami noong September 15 po dito, muntikan na sana kaming magkita. Pero may lakad din po ako, tapos siya nagla-live [online]. Kaya hindi kami nagkita. Baka sa susunod magkita na kami,” suno kay Rovelyn.
Mas nangin kilala si Rovelyn sa social media matapos nga nagtaliwan si Rene sa isa ka insidente sang pagkalumos sa Aurora sang Hunyo 2026.
Sang ulihi, nagsugod ang pamilya Baterbonia sang negosyo nga nagabaligya sang mga merchandise kag memorabilia nga ginhalad para sa pagdumdom kay Rene. Nakaagom ini sang nagkalain-lain nga reaksyon sa online, bangud may mga tawo nga nagsuporta sa pamilya samtang may iban nga nag-akusar sa ila nga nagapangwarta halin sa kamatayon sang amo nga student-athlete.
Samtang, nangin sentro man sang publiko nga diskusyon si Angelica matapos ang iya mga pahayag kaangot sa iya anak nga si Carlos.
Nangin masangkad ang atensyon sa amo nga family conflict matapos ang makasaysayan nga kampanya ni Carlos sa 2024 Paris Olympics kun sa diin nakadaog siya sang duha ka gold medals. Lakip sa ila mga isyu ang indi pag-intindihanay parte sa kwarta kag ang indi pagsugot ni Angelica sa relasyon ni Carlos kay Chloe San Jose nga iya na subong fiancée.#
