Gindala na pauli sa Britanya ang bangkay sang former One Direction star nga si Liam Payne tatlo ka semana matapos nahulog ini sa balkonahe sang isa ka hotel sa Argentina.
Nagbiya halin sa Buenos Aires kag pakadto sa London ang flight nga nagakarga sang bangkay ni Liam 1:58 pm local time suno sa sources.
Yara man ang iya amay nga si Geoff sa Ezeiza International Airport matapos ginproseso ang repatriation kag ginbisitahan ang lugar kun sa diin ginbawian sang kabuhi ang English singer.
Gin-report man sang Argentine media nga Myerkules sang aga sang ginsaylo ang bangkay ni Liam halin sa British Cemetery sa Buenos Aires kun sa diin ini gin-embalsamar.
Oktubre 16 sang napatay si Liam.
Nangin makakilibot ang kamatayon sini sa edad nga 31-anyos kag gilayon nga nag-ulan ang mensahe sang kasubo sang fans, pamilya, kag former bandmates sini nga sanday Niall Horan, Harry Styles, Louis Tomlinson, kag Zayn Malik nga nagpaguwa man sang joint statement.
Antes ang insidente, nabukaran sa record sang otoridad nga duha ka beses pa nga nagtawag ang hotel staff sa emergency services agud i-report nga may guest sila nga natam-an sa droga kag alcohol kag naga-eskandalo sa hotel room.
Pagkasunod sadto, nakit-an na ang lawas ni Liam sa idalom sang hotel kag ginkumpirma man nga may “substances” sa hulot sini nga ginaangot sa na-consume sini nga alcohol kag drugs antes napatay.
Ang English-Irish pop boy band nga One Direction ukon ID nga natukod sa London sang 2010 ang isa sa highest-grossing live acts sa kalibutan apang natabo ang indefinite hiatus sang 2016.
Isa ka semana matapos ang kamatayon ni Liam, nagbalik sa UK charts ang lima tanan ka albums sang boy band.
Ang ila third album nga Midnight Memories ang amo ang nanguna sang nagsulod sa chart sa number 13 nga may sales kag streams nga nagsaka 517% week-on-week suno sa Official Charts Company.
Tatlo man sa ila singles ang nagsulod liwat sa Top 40 samtang ang final solo single ni Liam nga Teardrops ang nakasulod man sa chart sa labing-una nga tion nga yara sa number 85.#
