Gin-anunsyo sang Department of Agriculture (DA) ang pagtukod sang food security task force agud nga ma-monitor sang maayo ang anuman nga problema sa suplay, presyo, kag pagpamaligya sang produktong agrikultura nga tuga sang krisis sang langis.
Suno kay DA Secretary Francisco Tiu Laurel Jr., ini nga task force ang magabulos sa ad hoc monitoring system.
Ma-track sini nga task force indi lamang ang suplay kag ang presyo sang nagapanguna nga balaklon kundi pati na ang imports kag ang exports.
Importante ang data nga makuha sang task force para nga malantaw sang maayo ang food situation sa pungsod.
Ipakigbahin ang kopya sini sa Kongreso kag sa Office of the President.
“Since the start of the war, we’ve been operating on an ad hoc basis. Now we are formalizing the task force so reports are standardized and more detailed, enabling faster and better decision-making,” suno sa tiglikom.
Iga-track man sang amo nga task force ang halit bangud sa paglain sang mga ruta sa Middle East. Lakip sa apektado bangud sa shipping routes amo ang nagapanguna nga Philippine exports kaangay sang saging kag pinya.
Nakit-an sang DA nga may daku nga “opportunity losses” sa exporters ang amo nga problema bangud nga kinahanglan nila ibutang ang shipments sa lain nga market sa mas manubo na nga presyo.
“If we redirect goods, we may have to sell cheaper. That affects both producers and the broader economy,” dugang sang opisyal.
Agud masuportahan ang sector, nagapakig-angot ang DA sa financial institutions kaangay sang Land Bank of the Philippines agud nga makahatag sang assistance sa exporters nga nagapamyerdehan.
Ginalantaw man subong sang ahensya ang dugang nga mga market nga kadtuan sang exports kaangay sa Africa, Australia, Europe, kag sa Southeast Asia apisar nga may limitasyon gihapon bangud sa logistical challenges kag sa competition.#
