Magapakasal na ang American singer-actress nga si Selena Gomez sa iya boyfriend nga si Benny Blanco.
Gin-anunsyo sang 32-anyos nga entrepreneur ang iya engagement sa 36-anyos nga songwriter matapos una nga ginsapubliko ang ila relasyon sang nagligad nga tuig.
Lakip sa ginpakita ni Selena amo ang iya singsing kag ila sweet photos nga may caption “forever begins now”. Sabat naman ni Blanco, “Hey wait… that’s my wife.”
Madasig naman nga nagkomento ang iya suod nga abyan nga si Taylor Swift: “Yes I will be the flower girl.”
Lakip man sa nagpanginbulahan amo sanday Cardi B, Gwyneth Paltrow, Jennifer Aniston, Suki Waterhouse, Lil Nas X kag iban pa.
Si Selena nga tumandok sang Texas, USA ang may yara sang 423-million followers sa Instagram kag ginakabig nga “most followed woman” sa amo nga social media app. Tag-iya man siya sang cosmetic brand nga Rare Beauty kag gin-anunsyo anay sang Septyembre nga nalakip na siya sa ‘youngest self-made billionaires in the United States’ nga may net worth nga $1.3 billion suno sa Bloomberg.
May yara siya anay sang high profile on-and-off relationship kay Bieber kag naka-date man ang singer nga si The Weeknd sang 2017.
Si Blanco naman ang isa ka record producer nga naka-trabaho kaupod kanday Rihanna, Calvin Harris kag Justin Bieber.
Antes ginsapubliko ang ila nga relasyon, naka-updanay na sila nga duha sa mga kanta nga I Can’t Get Enough sang 2019 kag Single Soon sang 2023.#
