Imbestigaran sang Office of the Ombudsman si anay Justice Undersecretary Jose “Jojo” Ragus Cadiz Jr. bangud sang ginaalegar nga kahilabtanan sini sa flood control corruption.
Ginpahayag ini ni Assistant Ombudsman Mico Clavano pila ka oras matapos ginkumpirma sang Malacañang nga nag-resign na si Cadiz sa posisyon.
“Definitely. That is something that the Ombudsman has to look into,” suno kay Clavano.
Pahayag niya, may mga reports nga nagaguwa kaangot sa involvement ni Cadiz, gani nga magatukod sila sang fact-finding body agud nga magpangusisa kaangot diri.
“Given all the allegations, however, not yet sworn into, but there are other reports as well of his involvement. And so definitely there will be a fact-finding body that will be dedicated to that,” suno kay Clavano.
“We will have to sift through the evidence. Wherever the evidence takes us, that’s where we will go,” dugang niya.
Matandaan nga sa isa ka nine-minute video ni resigned Ako Bicol representative kag former House appropriations committee chair Zaldy Co, gin-akusahan sini si Cadiz nga amo ang naga-akto nga bagman para kay President Bongbong Marcos.
Gin-alegar ni Co nga sang Nobyembre 2024, kadungan sang budget deliberations, nagtambong siya sa meeting kaupod kay anay House speaker Martin Romualdez kun sa diin yara man si Cadiz.
Suno kay Co, ginhambalan siya ni Cadiz nga tuman ka akig si Marcos bangud sang missing “remittances.”
Base sa alegasyon ni Co, ginmanduan siya nga magdul-ong sang P1 billion kay Marcos. Gin-alegar sini nga ang nag-instruct sa iya amo si Romualdez nga dal-an ang cash sa 30 Tamarind Street, South Forbes Park para ma-turn over sa president.
Matandaan nga naglutaw man anay ang pangalan ni Cadiz nga amo ang potensyal nga magbulos kay anay Justice Secretary Jesus Crispin “Boying” Remulla nga amo na subong ang Ombudsman.
Sang naglutaw naman ang kontrobersiya sang ginaalegar nga kurapsyon, nagpahayag ang DOJ nga indi sila mag-imbestigar kay Cadiz bangud ang may awtoridad nga maghimo sini amo ang Ombudsman.
