Ginkumpirma ni Senate President Vicente “Tito” Sotto III nga nag-withdraw sang ila pirma ang tatlo ka mga senador sa draft report sang Senate Blue Ribbon Committee kaangot sa imbestigasyon sa flood control corruption.
Ang nagbawi sang ila pirma amo sanday Senate Majority Leader Juan Miguel Zubiri, Senator JV Ejercito, kag Senator Sherwin Gatchalian.
Suno kay Sotto, ang pirmado nga draft nga na-leak sa publiko indi amo ang official report bangud nga diskusyunan pa ini subong nga adlaw, Pebrero 4.
Nahibaluan nga lakip sa nag-leak nga draft report amo ang rekomendasyon sang pagpasaka sang kaso-kriminal kag kaso-administratibo batok sa iban pa nga kaupdanan nila sa Senado nga sanday Senador Jinggoy Estrada, Senador Joel Villanueva, kag former Senate President Francis Escudero.
Ginrekomendar man sang Senate panel ang kaso-kriminal batok kanday former Sen. Ramon Revilla Jr., resigned Ako Bicol Rep. Zaldy Co, former Caloocan City Rep. Mitch Cajayon-Uy, former Education Undersecretary Trygve Olaivar, kag alleged bagman ni Escudero nga si Maynard Ngu.
Sa sulat naman nanday Zubiri, Gatchalian, kag Ejercito, ila ginsiling nga ginabawi nila anay ang ila pirma samtang nga ginapreparar pa ang final committee report agud nga mahatagan sila sang tyempo nga matun-an ini.
Suno naman kay Senate Blue Ribbon Committee Chairman kag Senate President Pro Tempore Panfilo Lacson, diskusyunan pa lamang subong nga adlaw ang draft partial committee report. Ini ang santo suno sa iya sa nakabutang sa rules of procedure sa mga kaangay sini nga inquiry in aid of legislation.#
