Nagpaandam ang director sang Jaro Archdiocesan Social Action Center (JASAC) nga si Msgr. Meliton Oso nga magasagsag ang kawatan kun wala sang hustisya kag kun wala ini ginasukot sang salabton sa iya sala nga nahimo.
Ini ang kabahin sang iya sermon sa Jaro Metropolitan Cathedral, Septyembre 13, kun sa diin namensyonar ang flood control project corruption scandal.
Suno kay Msgr. Oso, apisar ginapanugyan sa mga tumuluo nga magpatawad, indi dapat pag-basta lang nga kalimtan ang kurapsyon nga natabo kun sa diin masobra P1-trillion ang natakab halin sa kaban sang gobyerno.
“Ang P1-trillion nga nakawat sa flood control, forget? Lipatan ta lang? Ibaon ta lang sa limot? Bisan nga asta subong, madamo sa aton kauturan, ginabaha?” suno kay Msgr. Oso.
Ginhalimbawa sini ang Parokya mismo sa Hagonoy, Bulacan nga tubtub subong, apisar manug-isa ka bulan na halin sang naglaslas ang Habagat, wala gihapon nag-subside ang tubig-baha. Sa amo man nga Simbahan, ginkasal anay ang bride kag groom apisar sang mataas nga baha.
Pahayag sang JASAC Director, bisan nga may yara sang pagpatawad, dapat nga may yara gid sang hustisya paagi sa pagpasabat sa dapat nga manabat.
“Nagasagsag sila [ang mga kawatan] kun wala sang hustisya. Yes, we will forgive, but we must not forget. Dapat manabat ang nangawat sang bwasdamlag sang Pilipinas,” dugang sini.
Paathag pa sini, kun pagpatawad lang ang himuon kag wala sang accountability, madulaan sang kahulugan ang layi, mangin magamo ang sosyudad, kag matabo ang pagpang-duha duha sa moral nga aspeto bangud wala sang kunsekwensya ang sala nga mga ginahimo.
“Let us be wise. Balansehon naton ang pagpatawad kag hustisya,” suno kay Msgr. Oso. “Sa mga nangawat sang sobra isa ka trilyon, yes, we will forgive, but let us hold them accountable! Dapat mabalanse ang pagpatawad kag hustisya. Ang nangawat sa kaban sang banwa, dapat nga manabat,” ang pagtapos sini sa iya nga homily.
Nahibaluan nga ang pinakaulihi kag ginakabig subong nga pinakadaku nga isda nga nadakpan nga ginaangot sa flood control scandal amo si former House Speaker Martin Romualdez. Naka-confine si Romualdez sa ospital matapos nga gindagdagan sang arrest warrant sa kaso nga plunder.#
