Nagpahanumdom ang Simbahan batok sa nakaandan nga pagginawi kun sa diin may pag-usik sang pagkaon.
Nahinambit ini ni Msgr. Meliton Oso, director sang Jaro Archdiocesan Social Action Center, kadungan sang iya sermon subong nga gina-obserbar ang Extreme Poverty Day kag Indigenous Peoples’ Sunday, Oktubre 11.
Ginpresentar sini ang mga data partikular ang June 2026 Social Weather Stations (SWS) survey nga nagapakita nga 20.3% sa mga pamilya nga Pilipino ang naga-eksperyensya sang involuntary hunger.
Sa The State of Food Security and Nutrition in the World report nga gin-release sang United Nations kag ila partner agencies, nabutang man nga 645 million ka tawo sang 2025 ang naga-eksperyensya sang gutom.
Ginbalikan man ni Msgr. Oso ang mga tinaga anay ni former Iloilo City Mayor Rodolfo “Roding” Ganzon nga samtang may mga tawo nga nagakaon sang “egg kag ham”, may iban man nga naga-“igham” lamang.
“Just go back to your dining table. Just go back when you go to Jollibee. Ingkiton mo pero indi mo man pag-ubuson, while billions of brothers and sisters cannot eat,” suno kay Msgr. Oso. “Here we are, gina-uyangan, ginausikan ang grasya sang Diyos.”
Bilang kabahin naman sang pagpaninguha sang Archdiocese sang Jaro, may ginapatigayon nga feeding program sa pito ka mga parokya agud nga mabuligan ang undernourished nga mga kabataan.
Suno kay Msgr. Oso, kabahin ini sang pagsabat sa bulig nga ginapangayo sang The Second Congressional Commission on Education ukon EDCOM II agud nga ma-address ang child malnutrition nga ginalantaw nga isa ka severe foundational driver sang krisis sa edukasyon diri sa Pilipinas.#
