Nagpanawagan ang Simbahan sa publiko nga mangin mabinantayon kag usisaon kon sa diin ginagasto ang mga buwis nga ginakolekta sang gobyerno, ilabi na samtang nagapadayon ang deliberasyon sa proposed national budget para sa 2027.
Sa interview sang Bombo Radyo kay Monsignor Meliton Oso, director sang Jaro Archdiocesan Social Action Center, ginpahayag niya nga wala nagatapos sa pagbayad sang buwis ang responsibilidad sang mga pumuluyo. Dapat suno sa iya nga siguruhon sang publiko nga ang mga buwis ginagamit sa husto kag mapuslanon nga serbisyo publiko.
Importante man dugang niya ang pagbantay sang mga pumuluyo sa paggasto sang gobyerno, kasunod sang pag-apruba sang House of Representatives sa proposed national budget sa ikatlo kag katapusan nga pagbasa.
Natabo ini bisan may mga alegasyon kaangot sa pork barrel allocations, political patronage, kag indi patas nga paghatag sang prayoridad sa paggasto sang pondo sang gobyerno.
Suno kay Kabataan Party-list Representative Renee Co, ginabulubanta nga nagalab-ot sa P1.15-trillion ang mga alokasyon sa proposed budget nga mahimo makabig nga pork barrel. Lakip diri ang mga proyekto sa imprastraktura, ayuda nga ginatudlo nga may kaangtanan sa political patronage, lump-sum funds, kag iban pa nga kuwestiyonable nga alokasyon.
Samtang, nagapadayon na ang mga briefing kag hearing sa Senado kaangot sa proposed budget.
Bangud sini, ginpanawagan ni Oso ang publiko nga mag-aligmat, magpili sang mga lider nga may kaalam kag responsibilidad, kag magreport sang mga kaso sang korapsyon nga ila nahibaluan.
Ginlakip man sini sa panawagan ang pag-upod sa Dapat Isa Lang Movement, isa ka movement nga nagasuporta sa People’s Initiative para sa pagpasar sang isa ka epektibo nga layi batok sa political dynasty nga isa sa ginatudlo nga rason sang nagapadayon nga korapsyon kag kapigaduhon sa pungsod.#
