Nagpanawagan si Senator Loren Legarda nga mangin preparado batok sa epekto sang climate change kag dapat nga pabaskugon pa ang health services sa pungsod.
Ginpagwa sini ang panawagan pagkatapos ginbalhag sang The Lancet ang isa ka national study may kaangtanan sa ikaayong lawas kun sa diin nakabutang nga minilyon ang natuga nga kamatayon sang extreme heat index kag polusyon.
Base sa 2026 Lancet Countdown on Health and Climate Change, yara sa 710,000 ka tawo ang nagtaliwan sa bug-os nga kalibutan bangud sa extreme heat sang tuig 2023, kun sa diin masobra 70% ang naangot sa climate change nga tuga sang hilikuton sang tawo.
Yara naman sa 2.73 million ang nagakapatay kada tuig bangud sa polusyon sa hangin halin sa fossil fuels.
Sa pahayag ni Legarda, “Akala ng iba na ang climate change ay environmental issue lamang – hindi. Matagal ko nang sinasabing ang pagbabago ng klima ay usapin din ng kalusugan at buhay.”
Dugang niya, kadungan sang problema sa climate change amo man ang problema sa dengue, leptospirosis, heatstroke, altapresyon, kag iban pa nga balatian sa pagginhawa bangud sa polusyon sa hangin.
Gintumod man sa pagtuon ang naglab-ot $1.07 trillion ang nadula nga potensyal nga kita sang bug-os nga kalibutan sang tuig 2025 bangud sa tuman nga kainit kun sa diin nalakip sa pinakaapektado amo ang Southeast Asia.
