Ginakabig ni Lanao del Sur 1st district Rep. Zia Alonto Adiong nga “diversionary tactic” lamang ang hearing nga himuon sang Cayetano bloc sa guwa sang Senado subong nga adlaw, Hunyo 16.
Kasunod ini sang gin-anunsyo ni former Rep. Mike Defensor nga may “Blue Ribbon committee hearing” nga himuon 10:00 subong nga aga sa Doublegem EDSA Garden Events Place. Ginapahayag nga tambungan ini sang faction ni Sen. Alan Peter Cayetano kaupod ang 18 ka bagmen ni former Rep. Zaldy Co kag 14 ka iban pa nga mga indibidwal.
“The separate investigation or continuing Blue Ribbon committee… I don’t think within the current leadership now sanctioned this parallel Blue Ribbon investigation,” pahayag ni Adiong nga nagakwestyon kun lehitimo bala ini nga “hearing”.
Nauna na nga nagpahayag si Senate Blue Ribbon committee chairman Erwin Tulfo nga “illegitimate” ang ano man nga hearing nga himuon subong nga adlaw bangud wala sila sang gin-schedule nga ano man nga pagtilipon ukon inquiry.
Suno naman kay Adiong nga amo ang spokesperson sang House prosecution panel, ang amo nga tikang nanday Cayetano nagapakita lamang nga matuod ang obserbasyon nga nagahimo sila sang diversion ukon pag-liso ukon paglikaw sang atensyon sang publiko.
Dugang pa niya nga ang amo nga “imbestigasyon” nagapakita lamang nga isa ini ka PR stunt nga nagatinguha nga ilikaw ang atensyon sang publiko halin sa isyu sang impeachment.
“I think it’s just a diversionary tactic, in my humble observation, to create a parallel issue that actually would in a way sway the attention of the public. It only reinforces our earlier observation that this is just a distraction, a diversionary tactic and a PR stunt,” dugang ni Adiong.
Ginpaathag man ni Adiong nga may konstitusyonal nga obligasyon ang Senado nga magserbe bilang impeachment court batok kay Vice President Sara Duterte bangud naka-convene na ini para sa amo nga katuyuan.
“The impeachment trial is a constitutionally mandated priority of the Senate right now. They have already convened as an impeachment court and I think the people deserve clarity and closure on the subject matter that are allegedly committed by the vice president,” pahayag pa ni Adiong.
Matandaan nga ginapanindugan gihapon ni Cayetano nga siya ang Senate President, kag ginapanindugan man sini nga ang iya utod nga si Pia amo ang Blue Ribbon chair samtang si Rodante Marcoleta naman ang nagapanguna sa subcommittee.#
