Nakibot si private prosecutor Lorna Kapunan sa reaksiyon sang defense team matapos gin-atras sang prosecution panel ang tatlo sa apat ka impeachment articles batok kay Vice President Sara Duterte.
Ini matapos nga ginpahayag sang depensa nga indi patas ang amo nga tikang kag nagpaandam kaangot sa posibilidad sang mistrial kun himuon ini.
Kahapon, ginpahibalo sang prosecution sa impeachment court nga ginabawi na sini ang mga alegasyon batok sa Vice President nga may kaangtanan sa ginapahayag nga grave threats, sayop nga paggamit sang confidential funds, kag pagpangsuhol sa mga opisyal sang Department of Education (DepEd).
Ginpabilin sang prosecution ang isa ka impeachment article nga may kaangtanan sa indi maathag nga ginhalinan sang manggad ni Duterte ukon ang mga ginaalegar discrepancies sa iya Statement of Assets, Liabilities, and Net Worth (SALN).
Ginpahanugutan sang impeachment court ang desisyon sang prosecution.
Suno naman kay Kapunan, subong pa lamang siya nakakita sang isa ka respondent nga may apat ka alegasyon batok sa iya, apang nagareklamo pa bisan tatlo na sa sini ang gin-atras.
“Dito lang ako nakakita ng respondent na apat ang charges, tatlo ang dinismiss, siya pa nagrereklamo,” suno sa prosecution lawyer. “I’m very surprised at the reaction of the defense counsels…acting as if they are aggrieved because the charges were dismissed.”
Ginkuwestiyon man ni Kapunan kun nagpakig-angot anay ang mga abogado sa bise presidente antes nila ginpahayag ang ila reaksyon kahapon.
“I’m sure, if you are the vice president, instead of facing four complaints, four charges, isa na lang.. hindi ka ba happy? Baka ang hindi happy yung mga defense lawyers. Hindi natin alam bakit sad sila na nag-withdraw ng tatlong complaints ang prosecution,” dugang ni Kapunan.#
