Nagtaliwan na sa edad nga 86 si anay Senator John Henry “Sonny” Osmeña.
Suno sa iya utod nga si Annie Osmena-Aboitiz, napatay ang anay senador sa iya nga condominium unit sa Cebu City.
Natalana pa nga inanunsyo sang pamilya ang rason sang kamatayon ni Osmeña.
Nacremate naman ang iya nga bangkay.
Matandaan nga sang Hulyo sang nagligad nga tuig, gin-anunsyo ni Osmeña nga nainfect siya sang COVID-19 apang nakarecover man.
Si Osmeña ang isa anay ka Cebu City councilor, nangin vice mayor sang amo nga syudad sang 1960s, tubtob nga nangin miyembro sang House of Representatives.
Si Osmeña ang awardee sang Ten Outstanding Young Men sang 1970 kag isa man mga napilasan matapos ang 1971 Plaza Miranda bombing. Naeleher siya sa senado sang amo man nga tuig.
Matapos na-exile sa Estados Unidos kag nagpakigbato batok sa Marcos dictatorship, na-reelect si Osmeña bilang senador sang 1987 kag 1992.
Nagbalik siya bilang third district representative sa Cebu sang 1995 kag nangin senador liwat sang 1998.
Isa sa pinakakilala nga layi nga gin-author ni Osmeña amo ang Republic Act 7638 nga amo ang nag-create sang Department of Energy.
Magluwas sini nga mga posisyon, nagserbe man siya bilang alkalde sang Toledo City umpisa 2013 tubtob 2019.
