Nagsarurot pa ang balor sang Philippine peso sa panibag-o nga all-time low sa pagtakop sang trading subong nga hapon, Marso 27.
Naglab-ot na sa P60.55 ang baylo sang isa ka US Dollar.
Ini na ang pang-anum nga tion subong nga bulan nga nakadangat sa record low ang local currency.
Ginalantaw nga mas mabudlayan ang Pilipinas bangud kun magluya ang peso, mas magamahal ang pagbakal sang langis bangud dolyar ang ginagamit sa purchase.
Gina-import sang Pilipinas ang masobra 90% sang langis.
Kun magtaas ini, ginalantaw man nga magadasig pa ang inflation, gani nga nabutang man sa mabudlay nga sitwasyon ang Bangko Sentral ng Pilipinas kaangot sa interest rate hikes.
Una na nga nagpaandam ang head sang International Energy Agency nga ang krisis nga nag-umpisa sa gyera sang US, Israel, kag Iran ang maghimo maglapaw pa sa combined shock sang 1970s oil crises kag disruption dala sang 2022 invasion sang Russia sa Ukraine.
‘DOUBLE WHAMMY’
Gintawag sang economic think tank nga IBON Foundation nga double whammy ukon duha ka dungan nga negatibo nga event ang pagsarurot sang balor sang Philippine peso kag ang pag-surge sang global oil prices.
Sa interview sang Bombo Radyo kay IBON Foundation Executive Director Sonny Africa, iya ginpahayag nga ini nga duha ka bagay ang ginalantaw nga magapa-doble sang inflation sa masunod nga binulan nga maga-igu gid sa pigado nga mga pumuluyo.
Ginapahayag nga may maka-benepisyo sang pagluya sang peso kaangay sang mga pamilya sang overseas Filipino workers nga sa inisyal nga pagtulok amo ang makakuha sang dugang nga pesos sa kada dollar nga ginapadala sang ila pamilya abroad. Apang suno sa research group, bisan magsaka ang remittances sa peso terms, ma-offset gihapon ini sang mataas man nga domestic prices.
Diri na kag ginaduso sang grupo nga dapat nga may insigida nga tikang sang gobyerno, magpatunga na agud nga maproteksyunan ang purchasing power, suportahan ang palangabuhian, hagan-haganon ang inflationary pressures, kag indi dapat magpakuno-kuno nga normal lang ang tanan subong.#
