Temporaryo nga ginpauntat ang Game 2 sa Dinagyang Cup 2026 matapos ang tensyon nga natabo sa tunga sang hampang sa Mandurriao kag Iloilo City Proper.
Ginpatigayon ang match sa La Paz kagab-i, Pebrero 5.
Nag-ugat ang tensyon sa desisyon sang referee nga i-technical foul ang coach sang Mandurriao.
Sa interview sang Bombo Radyo kay Mr. Rudiver Jungco, Sr., Executive Assistant for Youth and Sports sang Iloilo City Government nga yara man mismo nagalantaw sa amo nga match, iya ginpahayag nga sa pamuno pa lang sang hampang, nagareklamo na ang coach sang Mandurriao sa kada tion nga indi ini kumbinsido sa kada call sang game official.
Pila ka beses ini natabo nga ginlaragway ni Jungco nga indi maayo nga gesture.
Suno kay Jungco, sang gin-technical foul na ini, didto kag naghana ini nga mag-walkout apang wala man dalayon naka-walkout bangud yara man gihapon ini sa sulod sang court.
May players ang Mandurriao nga nagtinir suno kay Jungco kag wala man nag-upod sa coach.
Pahayag pa sini, gindesisyunan na lang nga indi pagpadayunon ang hampang ilabi na bangud tensyonado sa gihapon kag madamo ang nagalantaw.
Suno kay Jungco, ipatawag sini ang magtimbang nga bahin kag desisyunan kun san-o sila maga-resume sa Game 2. Ginalantaw man kun ano ang sanctions nga mahimo idagdag sa coach sang Mandurriao.
OFFICIAL STATEMENT SANG TEAM MANDURRIAO
Sa official statement sang Team Mandurriao nga gin-post sa Facebook, nagpangayo ini sang pasensya sa natabo nga insidente nga nagresulta sa pag-postpone sang hampang.
Ginpaathag sang team nga nagapati sila sa respeto, sportsmanship kag patas nga kumpetisyon.
Apang pahayag nila, sa nauna pa lang nga minutos sang hampang, madamo na nga tumalan-aw ang naka-obserba sang inconsistency sa mga pag-officiate.
Ginplastar nila nga pila ka beses ini natabo apang ginpalampuwas lang sa ngalan sang hampang.
May isa ka punto nga nagreklamo ang ila coach suno sa team para sa safety sang player kag sa integridad sang hampang ilabi na bangud wala gid sang may gintawag nga call ang referee.
Didto sila kag nagreklamo ang coach, apang nakibot sila suno sa ila sang gindeklarar nga “thrown out” na ang ila coach bisan nga wala pa sang technical ukon formal warning.
Kun may nahambal man nga indi maayo suno sa team, ginapangayuan nila ini sang pasensya bangud halin man ini sa responsilidad kag pag-ulikid bilang coach nga luyag nga proteksyunan ang iya player sa court.
Nangayo sila sang pasensya sa league organizers kag referees kag nagpanawagan sang patas nga desisyon kasunod sang hitabo sang nagligad nga gab-i.
LEARNING EXPERIENCE PARA SA TANAN
Hugot naman nga ginabaton sang coach sang Team Mandurriao nga si Coach Jay Dan Delos Santos ang nangin sanction sa iya.
Suno sa iya, gin-suspend siya kag indi mahimo maka-coach sa iya team kun mag-resume na ang Game 2.
Ginplastar man sini kun ano ang nakabutang sa statement sang ila team kag ginpaathag liwat ang inconsistencies nga nakit-an sa pag-officiate. Sa interview sang Bombo Radyo, gin-ako niya ang iya nangin kapaltahan ilabi na sa iya gesture.
Pahayag sini, nabaton na sini kun ano man ang desisyon, madamo siya sang natun-an, kag tion na agud nga maka-move on sa amo nga hitabo.
“At the end of the day, baton ko man nga out na ko sa playing court kay bal-an ko man nga may kapaltahan ko ah,” pahayag sini. “Damo ta na-learn sa amo ni nga butang. Indi lang ako ang may natun-an kundi for sure ang mga naga-officiate man. Learning experience ni sa aton tanan. Sa liwat, gapangayo ako sang pasensya. Salamat, kag mag-move on na ta,” dugang sini.
