Ginkumpirma sang Department of Justice (DOJ) nga ginhawidan sang Estados Unidos sang Amerika ang kontrobersyal nga anay pulis nga si Retired Police Colonel Royina Garma bangud sa ginaalegar nga money laundering kag human rights violations.
Suno kay Justice Secretary Jesus Crispin Remulla, posible nga indi ma-apelar ni Garma ang ini nga kaso bangud ginalagas sang otoridad ang iya mga propiedad sa amo nga pungsod kag ang nasambit na na mga bayolasyon.
Ginplastar man sang tiglikom ang Global Magnitsky Human Rights Accountability Act nga napasar sang 2016 sa sanctions nga idagdag batok sa mga mapamatud-an nga guilty sa human rights violations kag corruption.
“Magnitsky Act ‘yan eh. They’re actually after her properties which she stored there, her money laundering activities, and of course, the human rights violations that were part of the Magnitsky Act,” suno sa tiglikom.
Suno kay Remulla, lantawon sang gobyerno ang Mutual Legal Assistance in Criminal Matters (MLAT) sa tunga sang Pilipinas kag Estados Unidos para sa posibilidad nga madala-pabalik pauli ang anay pulis.
Ini naga-require sa involved nga mga partido nga maghatag sang mutual assistance kaangot sa prevention, investigation, kag prosecution of criminal offenses, kag proceedings nga naangot sa mga kaso-kriminal.
“I’m asking the Immigration people to do the formal work,” dugang ni Remulla. “But anyway, we have the MLAT, Mutual Legal Assistance Treaty, so we will work this out.”
Matandaan nga gin-aresto kag gin-detain sang US authorities si Garma sang nagligad pa nga Nobyembre 7 bangud sa iya canceled visa.
Una naman nga nagdepensa ang kampo sini paagi kay Atty. Emerito Quilang nga wala siya sang plano nga magpanago sa Estados Unidos kag wala man sang problema ang iya visa sang nagbiya siya sa Pilipinas.
Si Garma amo ang anay police official kag anay general manager sang Philippine Charity Sweepstakes Office sa idalom sang anay administrasyon ni anay President Rodrigo Duterte.
Isa siya sa may pinakamatunog nga expose sa quad committee kaangot sa drug war ni Duterte ilabi na ang kaangot sa reward system ukon ang mga padya nga ginahatag sa mga pulis sa tion nga makapatay sang drug suspects.
