ILOILO CITY- Ginbuyagyag sang Iloilo City Urban Poor Affairs Office ang rason sang pagpangakig ni Mayor Jerry Treñas sa isa ka contractor nga naga-ubra sang relocation site sa San Isidro, Jaro.
Sa interview sang Bombo Radyo kay Mr. Roy Firmeza, pinuno sang opisina, iya ginpahayag nga ginkadismaya sang alkalde ang ginpresentar nga completion rate sang contractor nga Shalom Construction nga naka-base sa Cebu, umpisa sang ginpatigayon ang groundbreaking ceremony.
Suno kay Firmeza, sang 2021 pa ang groundbreaking apang tubtob subong, yara sa 15 porsyente palang ang ila completion rate sa 4 ka 5- storey buildings nga may 240 ka units.
Paathag naman sang construction company angot sa delay sang 200 million housing projects amo nga nadugayan ang pagproseso sang iban nga mga dokumento.
Bangud sini, ginapapasa sang alkalde ang amo nga contractor sang catch- up plans kag kinahanglan nga matigayon ini sa pinakamadali nga panahon.
Kun matapos ang proyekto, ang mga target nga benepisyaryo amo ang mga pumuluyo nga nagaistar sa mga danger zones sa syudad.
