Naligaran na sang isa ka bulan kag nalubong na ang 13-anyos nga solterito sa Barangay San Miguel, Jordan, Guimaras apang indi pa tul-id tubtub subong kun may foul play gid man ukon wala sa likod sang ginapahayag pagpanginmatay sini.
Kun matandaan, nasapwan sang Oktubre 26 ang biktima nga si Alias JK nga nagabitay sa puno sang itang-itang rason nga gin-alegar naghikog ini — butang nga indi pagpatihan sang pamilya bangud ginpahayag nga wala man ini sang problema.
Natukiban sang ulihi paagi sa resulta sang autopsy nga may nag-igu nga matig-a nga bagay sa ulo sang biktima rason nga ginpahayag nga posible ginlampusan ini tubtub nga napatay.
Sandig sa inisyal nga imbestigasyon sang pulis, ginpahayag nga away sa duta ang ginalantaw nga pinakarason bangud may kumprontasyon pa sa tunga sang pamilya sang biktima kag gin-alegar mga suspek antes ang insidente.
May ginsundan ang mga pulis nga persons of interest kag ginpasalig nga ipasaka ang kaso nga Murder batok sa duha-tatlo ka tawo nga nag-execute sang krimen.
Sang ulihi, ginkumpirma nga may nakit-an nga cellphone sa lugar kun sa diin nakit-an ang lawas sang biktima kag gin-sumite ini sa Regional Anti-Cybercrime Unit (RACU) agud mabukad kun ano ang unod.
Ginapahayag nga may findings na nga napasa ang RACU kun ano ang content sang cellphone. Sa interview sang Bombo Radyo kay Police Major Kenneth Bermejo, hepe sang Jordan Municipal Police Station, iya ginpahayag nga magapatigayon liwat sang imbestigasyon kag case evaluation ang mga pulis. ##
