ILOILO – Magasumpa sa Malacañang si Iloilo Provincial Governor Arthur Defensor Jr. bilang chairman sang Regional Peace and Order Council sa Lunes, Oktubre 28.
Ang oathtaking ceremony ang pagpangunahan mismo ni Presidente Rodrigo Duterte kaupod si 3rd Infantry Division Commander Major General Dinoh Dolina kag Police Regional Office 6 Director Police Brigadier General Rene Pamuspusan.
Sa interview sang Bombo Radyo kay Defensor, iya ginpahayag nga bilang bag-o nga pinuno sang Regional Peace and Order Council, hatagan niya sang igtalupangod ang mga problema tuhoy sa insurhensya sa rehiyon ilabi na sa probinsya sang Iloilo.
Ginakabig pagpanghangkat ni Defensor ang pagpatuman sang executive order sang Presidente kag pagdala sang serbisyo sa lokal nga lebel agud nga mahatagan sang nagakaigu nga bulig kag palangabuhian ang mga apektado sang insurhensya.
Tuyo ni Defensor nga matapna ukon ma “bull’s eye” ang lapnagon nga problema.
Suno kay Defensor, may yara na sang natukod nga Provincial Task Force nga amo ang magatutok sa local communist armed conflict sa Iloilo.
Si Defensor ang nominado man bilang Chairman sang Regional Development Council apang nagahulat pa sang pormal nga “appointment” gikan sa Presidente.
