Magapasaka na sang grave threat complaint subong nga Oktubre 24 si ACT Teachers party-list Rep. France Castro batok kay former President Rodrigo Duterte.
Ini kasunod sang mga ginpangbuy-an nga statement ni Duterte batok sa amo nga mamalidha kaangot sa confidential funds nga ginhingyo sang iya anak nga si Vice President Sara Duterte.
Kun matandaan sa amo nga statement, ginsiling sang anay presidente nga dapat gamiton ang confidential funds sa paglagas kag pagpapas sa komunista nga grupo — kag ang una amo si Castro.
via Abogado website
Suno kay Castro, kaupod niya nga magapasaka sang panumbungon sa Quezon City Regional Trial Court amo ang volunteer lawyers halin sa National Union of Peoples’ Lawyers.
Suno pa sa amo nga mamalidha, naga-obra lamang siya sang iya trabaho nga busision ang budget, kag ang mga pagpamahog ni Duterte ang makabig na nga krimen batok sa iya.
Antes ang pag-file sang complaint, nag-istorya man si Castro sa iban nga mga lideres sa Kamara kaangay kanday Minority leader Marcelino Libanan kag iban pa nga committee chairmen halin sa majority agud makapangayo sang abiso kag suporta.
Una na nga ginpahayag ni House Majority leader Manuel Dalipe nga suportahan sang lower chamber ang anuman nga legal action nga ipasaka batok sa former chief executive kaangot sa amo nga isyu. #
