Indi madayon ang ginabantayan kuntani sang mga kritiko nga local trial kay anay Presidente Rodrigo Duterte matapos nga ginbasura sang Quezon City-Office of the City Prosecutor ang grave threat complaint nga ginpasaka ni ACT Teachers Representative France Castro.
Sa resolusyon nga napetsahan Enero 9, nabasura ang reklamo sang mamalidha bangud ginpahayag nga kulang ini sa ebidensya.
“After a careful and judicious evaluation of the allegations and evidence obtaining in the complaint, the undersigned finds the same to be insufficient to indict respondents for the crime charged against him,” kabahin sang nakasaad sa resolution.
Ang amo kuntani ang criminal complaint batok kay Duterte ang ginakabig nga “test case” sa prosecution kag justice system sa Pilipinas.
Ini ang labing-una nga criminal complaint matapos nga na-expire na ang immunity ni Duterte sang nagtapos ang termino sini sa pagka-presidente sang Hunyo 2022, kag ini man ang tyansa nga mapasaka sa court trial ang iya sunod-sunod nga alleged red-tagging kag grave threats.
Matandaan nga Oktubre 2023 sang nagpasaka si Castro sang reklamo kay Duterte bangud gin-angot siya sini sa communist armed movement kag nagsiling pa nga dapat unahon patay ang amo nga mamalidha.
Antes pa man ginbasura sang prosecutors ang panumbungon, no-show na nga daan si Duterte sa duha gid ka schedule sang ila nga preliminary investigation.
