Sin-o sa inyo ang pirme lang ginaakigan sa balay bangud basketball lang ang gina-obra, kag kun magpuli, mamangkot lang dayon kay Nanay kun ano ang sud-an?
Kun sa mga amo sini nga bagay, gina-ugtasan ang hampang, lain naman ang natabo didto sa Georgia kun sa diin ginhungod gid nga palawigon ang paghampang sang ball game nga naglawig sang 121 oras kag tatlo ka minutos.
23 sila nga naghampang nga naga-edad 17-anyos tubtub sa 64-anyos. Gin-require sila nga magtinir sa gym sa bilog nga hampang bisan sa ila nga short break.
Nagbuslanay lang sila sa hampang, malip-ot lamang ang pahuway, nagatulog-tulog samtang yara man sa gym, kag ginbantayan man sang opisyal halin sa Guinness World Record.
Ang players lunsay katapo sang Men Opposing Sex Trafficking (MOST)nga isa ka Atlanta-based nonprofit organization.
Sila ang nagsugod sang lima ka adlaw nga marathon agud nga mapakilala ang ila kawsa kag agud nga makatipon sang pondo.
Natukod ang MOST sang 2022 agud mag-edukar ang iban nga mga lalaki nga magbulig nga matapna ang sex trafficking. Ini nga nonprofit nagalakip na sang data analysts kag interdiction team sang former military kag law enforcement professionals nga nagabulig sa sting operations and prevention sa bilog nga pungsod.
Sang ginhimo nila ang word record, gin-livestream man sila kag naghatag naman sang donasyon ang ila nga supporters. Sa kabug-usan, nakatipon matuod ang grupo sang masobra $300,000 ukon masobra sa P17.2-million para sa ila nga misyon.#
