Ginatun-an sang Iloilo City General Services Office (GSO) nga magbutang sang mga portalets kag waste bin sa Iloilo Sunset Boulevard.
Ini kasunod man sang pagdaguso sang mga tawo sa lugar sang Dinagyang Festival 2025 nga nagdala man sang madamo nga basura.
Sa interview sang Bombo Radyo kay Engineer Niel Ravena, head sang General Services Office, iya ginpahayag nga nagapakig-angot na sila sa Iloilo City Environment and Natural Resources Office (CENRO) agud istoryahan ang mga mahimo ibutang nga ancillaries sa Sunset Boulevard.
Suno kay Ravena, ang plano ang may tuyo nga ma-mitigate ang paglapta sang mga basura kag mapabilin nga malimpyo ang bag-o nga tourist spot.
Ginalantaw man sang talatapan nga magpahamtang sang mga bench sa lugar agud nga maka-relax ang mga may tuyo magbisita sa Sunset Boulevard.
Positibo naman ang natungdan nga mapatuman sang matalunsay ang mga tikang agud mas mapa-improve ang 7 kilometers nga proyekto.
