GUIMARAS – Ginpaidalom na sa state of calamity ang Probinsya sang Guimaras bangud sa pagtaas sang kaso sang dengue.
Ang nasambit nga deklarasyuon ang ginpatigayon duha ka semana matapos gindeklara ni Guimaras Governor Samuel Gumarin ang dengue outbreak sa nasambit nga probinsya.
Humalin sang gindeklara ang dengue outbreak, ginkulang na ang health facilities sa Guimaras.
Suno kay Gumarin, bangud yara na sa state of calamity ang Guimaras, mahimo na nga magamit ang 5% nga Local Disaster Risk Reduction Management Quick Response Fund sa diin gamiton ini sa mitigation kag response measures.
Humalin sang Enero tubtub Hulyo 20, nagdangat na sa 893 ang dengue cases sa Guimaras sa diin 3 na ang patay.
Ang nasambit nga numero ang mas mataas sang 1, 439.7% kun ipaanggid sa 58 cases nga narekord sang nagligad nga tuig sa kaangay nga period.
Suno kay Gumarin, magabakal ang Guimaras sang larvicide, bulong, mosquito nets kag dengue rapid kits nga ipanghatag sa mga eskwelahan sa probinsya.
Magadugang man sang doktor kag medical practitioners agud mabulong ang mga pasyente nga may dengue nga na admit sa mga ospital kag rural health centers.
